Աշխատանքի տեխնիկական բնութագիր Մարալիկի սոցիալական տան բնակիչների համար հոգեբանի աշխատանքի շրջանակը

Պաշտոնը՝ Հոգեբան (Մարալիկի սոցիալական տուն)

Ծրագրի անվանումը՝ «ՐԱՅԶ – Հայաստան․ տեղահանված և խոցելի բնակչության վերականգնում, սոցիալական ներառում և հզորացում» ծրագիրը։

Ծրագրի նպատակն է Հայաստանում խոցելի բնակչության, այդ թվում Լեռնային Ղարաբաղից տեղահանվածների համար սոցիալական պաշտպանության համակարգի բարելավումը՝ սոցիալական աշխատողների կարողությունների զարգացման, ինչպես նաև նոր սոցիալական ծառայությունների՝ պատրոնաժի, սոցիալական խնամքի և սոցիալ-վերականգնողական ծառայությունների հասանելիության ապահովման միջոցով։

Ծրագրի տևողությունը․ Նոյեմբեր 2024 – Նոյեմբեր 2027

Հաշվետու է՝ Սուպերվիզորին

Ծրագրի շրջանակներում աշխատանքի իրականացման վայրը՝ ք․ Մարալիկ, Շիրակի մարզ (Մարալիկի սոցիալական տուն)

Գործողության սկիզբ՝ 01/04/2026

Գործողության ավարտ՝ 01/04/2027

1․ Բովանդակությունը և նպատակը

Հոգեբանի կողմից իրականացվող միջամտությունը նպատակ ունի նպաստել սոցիալական տան բնակիչների հոգեկան առողջության, հոգեհուզական կայունության և սոցիալական հարմարվողականության բարելավմանը՝ անհատական և խմբային հոգեբանական աջակցության տրամադրման միջոցով։

Հոգեբանի հիմնական պարտականություններն ու պատասխանատվությունը ներառում են շահառուների հոգեբանական վիճակի գնահատումը, հոգեհուզական խնդիրների վաղ հայտնաբերումը, վարքային և հուզական դժվարությունների հաղթահարման աջակցությունը, ինչպես նաև խմբային աշխատանքների կազմակերպումը՝ նպաստելով շահառուների սոցիալական ներառմանը և կյանքի որակի բարելավմանը։

Հոգեբանը պարտավոր է հարգել շահառուի մասին իրեն հասանելի դարձած տվյալների գաղտնիությունը, շահառուի արժանապատվությունը, առաջնորդվել շահառուի անհատական առանձնահատկություններով, ինչպես նաև համագործակցել շահառուի ընտանիքի անդամների և շահառուին աջակցող այլ մասնագետների հետ։

2․ Ընդհանուր պահանջները

Հոգեբանական ծառայության տրամադրման ձևաչափը․ Հոգեբանական ծառայությունները տրամադրվում են սոցիալական տան տարածքում՝ անհատական խորհրդատվությունների և խմբային հանդիպումների ձևաչափով։

Ծառայության տրամադրման մոտեցումը․ Հոգեբանը աշխատում է սոցիալական տան բնակիչների հետ՝ գնահատելով նրանց հոգեբանական և հոգեհուզական վիճակը։ Գնահատման արդյունքների հիման վրա մասնագիտական թիմի (սոցիալական աշխատող, բուժքույր և այլ մասնագետներ) հետ համատեղ պլանավորվում են անհրաժեշտ միջամտությունները և աջակցման ձևերը։ Շահառուների հետ իրականացվող միջամտությունները ենթակա են կանոնավոր վերանայման և քննարկման թիմային հանդիպումների ընթացքում՝ առնվազն ամսական մեկ անգամ։

Հոգեբանական ծառայությունները պետք է իրականացվեն այնպիսի մոտեցմամբ, որը նպաստում է շահառուների հոգեկան առողջության պահպանմանը, հուզական կայունության ամրապնդմանը, ինչպես նաև սոցիալական և հաղորդակցական հմտությունների զարգացմանը։

3․ Հոգեբանի աշխատանքային պարտականությունները

3.1. Հոգեբանական գնահատում և խորհրդատվություն.

• Իրականացնել սոցիալական տան բնակիչների հոգեբանական վիճակի առաջնային և պարբերական գնահատում։
• Իրականացնել շահառուների ճանաչողական կարողությունների և հոգեկան առողջության առաջնային գնահատում։
• Տրամադրել անհատական հոգեբանական խորհրդատվություն՝ աջակցելով շահառուներին հաղթահարել հոգեհուզական դժվարությունները։

3.2. Հոգեհուզական աջակցության տրամադրում.

• Աշխատել կոնֆլիկտային իրավիճակների, բռնության փորձառությունների, կորստի և վշտի, դեպրեսիվ դրսևորումների, մոտիվացիայի նվազման և այլ հոգեբանական խնդիրների հետ։
• Աջակցել շահառուներին հուզական կայունության պահպանման և սոցիալական հարմարվողականության գործընթացում։

3.3. Վարքային խնդիրների գնահատում և ռիսկերի կառավարում.

• Աշխատել վարքային խնդիրներ ունեցող շահառուների հետ։
• Գնահատել հնարավոր ռիսկերը, այդ թվում ինքնավնասման կամ ագրեսիվ վարքի դրսևորման հավանականությունը։
• Անհրաժեշտության դեպքում առաջարկել համապատասխան միջամտություններ կամ ուղղորդումներ մասնագիտացված ծառայությունների։

3.4. Խմբային աշխատանքների կազմակերպում

• Կազմակերպել և վարել խմբային հանդիպումներ և քննարկումներ սոցիալական տան բնակիչների հետ՝ հոգեհուզական թեմաների շուրջ։
• Նպաստել փոխաջակցության, հաղորդակցության և սոցիալական հմտությունների զարգացմանը շահառուների շրջանում։

3.5. Այլ գործառույթներ

• Կատարել կանոնավոր գրառումներ շահառուների հետ իրականացված աշխատանքի վերաբերյալ,
• Մասնակցել թիմային հանդիպումներին և դեպքերի քննարկումներին։
• Պահպանել շահառուների անվտանգության ապահովման բոլոր կանոնները և էթիկական սկզբունքները։

4․ Հոգեբանին առաջադրվող որակավորման նվազագույն պահանջները

• Բարձրագույն կրթություն հոգեբանության ոլորտում։
• Հոգեբանական խորհրդատվության կամ հոգեսոցիալական աջակցության ոլորտում առնվազն 3 տարվա աշխատանքային փորձ։
• Խոցելի խմբերի (տարեցներ, հաշմանդամություն ունեցող անձինք, տեղահանված անձինք, մանկատան շրջանավարտներ կամ երեխաներ) հետ աշխատանքի առնվազն երկու տարվա փորձ:

4. Հայտերի ներկայացման կարգ

Հետաքրքրված թեկնածուները պետք է մինչև 27/03/2025 թ. ներկայացնեն հետևյալ փաստաթղթերը՝

• Ինքնակենսագրական (CV)

• Կրթությունը և մասնագիտական որակավորումը հավաստող փաստաթղթերի պատճեններ (լիցենզիա, վկայականներ, փորձառությունը հիմնավորող փաստաթղթեր և այլն՝ ըստ պաշտոնի)

Փաստաթղթերը պետք է ուղարկել էլեկտրոնային տարբերակով հետևյալ էլհասցեին՝ procurement@aasw.org 

Էլ. նամակի թեմայի տողում անհրաժեշտ է նշել համապատասխան լոտի համարը և պաշտոնի անվանումը։

Միայն կարճ ցուցակում ընդգրկված թեկնածուները կհրավիրվեն հարցազրույցի։